Релативно неодамна дознавме за претстојната ТВ адаптација на серијалот од Guerrilla – Horizon, но веќе деталите за концептот на серијата, приказната и што да очекуваме протекоа во јавност.
Според инсајдерот во индустријата Jeff Grubb, ТВ-шоуто на Netflix ќе го носи името “Horizon 2074” и ќе биде „поделено помеѓу временската линија што ја гледате во игрите и временската линија каде работите почнуваат да паѓаат“. Grubb објасни дека идејата, како што се прикажува шоуто во моментот, е тоа да не биде „рестартирање или римејк од приказната на играта“. Наместо тоа, ќе дејствува како придружник на игрите и „се одвива паралелно со нив и ќе ги објасни другите елементи што се случуваат низ светот“.
Grubb продолжи да збори дека шоуто ќе биде снимано најмногу во Торонто. Веројатно целата серија ќе биде таму, но поголемиот дел ќе биде во тој град. Ако она што го вели Grubb се покаже дека е точно, тоа значи дека ќе ги видиме не само Aloy и нејзините другари, туку и повеќе од ликови како што се нејзината претходничка Elisabet Sobeck и сеопфатниот антогонист на Zero Dawn, Ted Faro.
Како и со сè што не е потврдено од официјални извори, и ова засега треба да го сфатиме како нешто што е можно да биде баш вака. Сепак, ова ќе создаде интересен концепт за шоуто. Во меѓувреме, неодамна подетално го разгледавме спин-офот Horizon VR, Call of the Mountain.
Call of the Mountain ќе биде искуство во прво лице, поставено на постапокалиптичниот свет на серијалот. На играчите им дава нов лик – Ryas, поранешен Shadow Carja Warrior кој се надева дека ќе се откупи себеси со истражување на сериозна закана за Сандом – и ги поставува во авантура во која се појавува главниот лик од главната серија Aloy и мноштво други познати лица.