Nintendo Switch 2 – Рецензија

Nintendo Switch 2 во Македонија како и многу други работи малку заглави на царина, не го добивме на прв ден како што беше планирано, па ние коишто бевме љубопитни да го истестиравме и маста да му ја извадиме, моравме малку да запалиме кола и да одиме кај нашиот јужен сосед. Нема да навлегуваме во детали за тоа, но сепак доколку некој го интересира, конзолата е купена од Грција. Со ЕДИНСТВЕНАТА игра којашто беше нова и достапна да се купи цената беше како таа што си беше најавена.

Switch 2 е конзолата којашто долго време се очекуваше да ја добиеме, многу често се запрашувам и зошто тоа го мислев дека ја чекам и посакувам … Уште од моментот кога протече хардверот којшто ќе се користи во самата конзола беше јасно дека овој Switch 2 ќе биде само малку подобрен, но во секој друг аспект ќе биде истиот уред. Со многу минимални промени. Дали тоа разочарува? Сакам да кажам да многу, но сепак подоле ќе сфатите подобро.

Оваа рецензија ја пишувам после целосно поминати 24 часа со уредот и конзолата, тестиран за се што е потребно и сметам дека 24 часа користење е максимално време за колку треба и може да се ужива со овој уред на којшто му е ставено само бројка во името и како што кажав само некои работи се подобрени. Од одма морам да кажам дека чувството на купување Свич 2 би можел да го споредам на едноставен начин. Мобилните уреди на самсунг имаат повеќе серии како S, A, M … Доколку сте користеле A или M серија на Самсунг мобилен уред и сте биле задоволни, кога ќе земете S серија веднаш чувствувате промена и квалитет. Епа A серија е Switch 1, S серија е Switch 2.

Nintendo Switch 2, Фото: Марио Спасевски, GG.MK

Квалитетот на Switch 2 е единственото позитивно нешто…

Како што кажав погоре, споредбата со Самсунг мобилните уреди, навистина не може да се опише колку Switch 2 е подобрен во квалитет во секој аспект од првиот свич и Свич Олед (освен во екранот, не се рамни со Олед). Ќе почнам прво да зборам за екранот којшто поради некоја причина во 2025 година е LCD, но сепак за зачувување на батерија ќе се преживее и LCD додека не дојде OLED верзијата. Прилично голем уред со 7.9″ екран којшто за мене лично е малку поголем од што би сакал да биде. За некои луѓе па може и екранот да е мал, но јас преферирам барем малку поголем од телефон, ова е многу повеќе од мобилниот уред којшто моментално го користите или ви е ставен во близина.

Екранот е Full HD со поддршка на 120FPS, HDR, VRR и сите можни чуда. Доколку на стариот уред можевте да ги гледате пикселите во игрите, овде едноставно можете да уживате во вашите омилени Нинтендо светови. Уште од моментот кога ќе стиснете Power On, одма се гледа драстичната промена којашто е за плакнење очи. Ако сакате пак споредба, доколку се промените од добар Full HD телевизор на 4K телевизор, епа такво е чувството.

Оној грдиот и најглупавиот држач којшто доаѓање со стариот уред, којшто подоцна го средија на оледот, но сепак на првиот модел никако не си ја вршеше својата функција бидејќи дизајнерот очигледно не знаел што прави … Во новиот уред Switch 2 е направен маестрално. Многу наликува како држачот на ОЛЕД уредот само што има дупка во самиот држач за полесно и секакво местење. Како сакате можете да го наместите уредот па дури и можете повеќе сила да употребите на држачот. Шансите да се скрши, пукне или нешто да му се случи се многу помали од порано. Нормално ако го форсирате тоа ќе пукне … Пластика е … Но сепак за секојдневно користење е маестрално квалитетно направен.

Свич секогаш за мене бил уред којшто примарно сакам да го играм во таблет верзијата, многу ретко сакав да го играм на ТВ. Кога веќе е рачен уред, сакам да го користам за тоа што е наменет. Да, супер е и да се стави во „Докот“ и да си се поврзе тоа на телевизор, но сепак на крај на денот таблет моментот ми е тоа што ме исполнуваше. Но … 4К резолуција дами и господа … Не знам како би го играл во Таблет верзија овој уред. Мора да се види и почувствува тоа што е за 4К во док верзија, бидејќи сепак разликата се приметува и тоа драааастично многу!

Но сепак колку и да убаво да се игра и во таблет форма и во ДОК форма на телевизор, целиот уред, и таблетот и докот се МАГНЕТИ за прсти и прашина. Во секунда се лепи се на него, ужасно премногу остануваат отисоците од рацете и прстите на уредот, а посебно на докот. Тој треба да се земе внимателно, да се стави на полица, да се исчистат отисоците каде што е фаќан и после само да се чисти од прашина.

Nintendo Switch 2, Фото: Марио Спасевски, GG.MK

Уредот е многу цврст!

Под цврст не значи дека вие можете да го мавате од земја, или да му удирате боксови и да издржи, под цврст подразбирам на колку е добро изработен, специфично за многу скептичните моменти. Уште од самото претставување сите станаа скептици како новите Joy-Cons (контролери) коишто овој пат се на магнет, ќе бидат издржливи. Контролерите всушност се држат на една плочка којашто ги конектира, и сите кренаа паника дека уште во првиот момент тие ќе бидат скршени. Да … можат да се скршат ако сте лудаци и стварно сакате да го скршите … Но Нинтендо имаат направено фора а тоа е дека не се стабилни, туку малку се мрдаат што доколку и вие со сила сакате да ги извадите контролерите, тие ќе излезат. Под сила мислам на желба стварно да ги откорнете.

Така што, немојте да се плашите од никакво кршење на контролерите, од запците/плочките коишто ги држат контролерите и од ништо такво. Интересно е што контролерите можете да ги ставите како сакате. Не е потребно синиот на сината страна или црвениот на црвената страна. Можете и обратно да ги ставите, ако мислите дека можете да играте обратно … Но исто така можете да ги свртите и целосно од другата страна … Спидранери веќе го прават ова.

Материјалот на копчињата е доста квалитетен. Целиот материјал, посебно копчињата се облиени со специјална облога што ги прави A-B-X-Y и Up-Down-Left-Right да се под облогата. Со ова веројатно никогаш нема да доведе до обледување на копчињата. Но сепак и тие копчиња се малку чуднички и малку болат прстите после неколку часа играње на … повторно мора да се спомне … Единствената нова игра којашто е достапна уште од прв ден – Mario Kart World.

Болат прсти од Копчињата

Во овие 24 часа од како го имам и тестирам новиот Свич 2 извозев голем број на трки во новата Марио Карт и извозев многу километри низ целиот отворен свет којшто го нуди самата игра. Многу пати требаше да правам пауза од неколку минути поради тоа што прстите страшно многу ме убиваа поради чудните копчиња коишто го имаше контролерот. Од тригерите не толку, тригерите се предобро направени, но сепак копчињата можеби дека се помали за разлика од други големи контролери, навистина ме убиваа.

Копчињата се буквално исти како и од стариот Свич уред, но сепак овој пат дали дека е нешто ново, дали облогата е малку појака од што е потребно, новите копчиња за мене лично се голема негативна работа. Можеби не сум навикнат толку долго да гејмам на Нинтендо Свич, но сепак се чувствував како да гејмам на многу лоша изработена конзола со лоша пластика …

Најдобар предлог е да ја играте конзолата со контролерот на којшто се закачуваат малите џој-кони. Овој пат иако изгледа најглупаво на цел свет како и минатата генерација … е мноооогу подобро и поквалитетно изработен.

Nintendo Switch 2 Joy-Cons

Дали вреди Switch 2?

Честитки ако си од оние што само „скролна“ најдоле да го прочиташ ова, не е лошо ни тоа. Но сепак, доколку се прочита и стигна до тука браво и за тебе. Дали вреди Switch 2 е најдоброто прашање од аспект на цена, колку нови игри има достапни на прв ден, колку е новата цена на игри и сите други работи. Веднаш би кажал дека одговорот на прашањето Дали вреди е најтешко да се одговори и би кажал директно „ДА и НЕ“.

Зошто не вреди -Многу е скап уредот и многу се скапи новите игри. За тоа што го добивате навистина толкава голема сума на пари не вреди. Да дадете 500 евра на уред којшто доаѓа само со една игра, којашто не е нова сериозна Марио или Зелда игра, туку е само Марио факинг Карт игра, којашто е добра но сепак е КАРТ, е многу глупаво искрено … Доколку имате стара конзола свич не вреди ниту малку да правите ажурирање од тоа да вложите во нешто ново. Доколку имате се изиграно, и не сакате повторно да ги играте сите игри во подобра резолуција нема никаква поента сè уште да се купува.

Зошто вреди – Се работи за нова конзола. Да не се лажеме првата и главна причина зошто вреди да се купи е дека се работи за тотално нова конзола којашто можеби пред тоа имало нешто слично, но сепак ова е ново и многу подобро … Настрана од тоа, Switch 2 вреди и поради неколку други работи. Како на пример доколку сакате да имате Switch нов, можеби е глупо и скапо но е подобро да се вложува во оваа конзола за разлика од стариот свич уред. Најдобро е да вложите во овој нов модел со тоа што доколку сакате да ги играте старите игри, доколку ги немате играно, ќе си барате луѓе коишто ќе ви ги донираат за да ги изиграте. Единствена причина зошто би го предложил е само доколку сте немале. Нема друга причина искрено … или не знам што друго би кажал.

Кога е најдобро да се купи – Како што кажав и погоре, веднаш доколку имате финансии да вложите и сакате, но доколку не ви е мерак, почекајте да излезат нови игри коишто ќе ви фатат око.

Nintendo Switch 2, Фото: Марио Спасевски, GG.MK

МАРКЕТИНГ

ГТА 6 е една од најочекуваните видео игри во историјата на гејмингот и гејминг индустријата. По повеќе од една деценија шпекулации, гласини, огромни протекувања и безброј прашања кога конечно ќе пристигне следното продолжение на легендарниот серијал. Рокстар Гејмс се подготвуваат повторно да нè вратат во светот кој не сме го виделе од раните 2000-ти години. После толку време ќе се вратиме во фиктивниот свет и регион познат како „Вајс Сити“. Но, за да разбереме зошто ГТА 6 предизвикува толкава возбуда, мораме да се вратиме малку наназад. Поточно, во септември 2013 година.

Тогаш PlayStation 3 и Xbox 360 сè уште беа актуелни конзоли, паметните телефони изгледаа поинаку, ТикТок не постоеше, а светот сè уште не знаеше колку време ќе помине пред да ја добие следната Grand Theft Auto игра. Рокстар Гејмс ја објави ГТА 5, нè однесе во фиктивниот град Лос Сантос и ни ги претстави карактеите Мајкл, Френклин и Тревор. Тогаш веројатно никој не ни помислуваше дека ова ќе биде играта во која ќе поминеме добар дел од следната деценија. Во меѓувреме, ГТА 5 стана многу повеќе од обична видео игра. Во рок од 13 години се искачи на третото место за најпродавани игри во историјата со повеќе од 235 милионии копии продадени на сите платформи.

Додека ГТА 5 продолжуваше да бележи огромен успех, а ГТА Online постепено прераснуваше во сопствен гејминг-феномен, прашањето за следното продолжение стануваше сè погласно. Гејмерите веќе почнаа да се прашуваат кога Рокстар Гејмс конечно ќе го најави следното поглавје.

Rockstar Games, Rockstar VI

Плановите за ГТА 6 започнале многу порано отколку што јавноста почна да претпоставува. Според Роб Нелсон, еден од раководителите на „Роксар Нортх“, уште во 2015 година дел од тимот отпатувал во Мајами за да ги прави целосните истражувања и анализи за проектот. Проектот тогаш го носел кодното име „Проџект Америкас“, а првичните амбиции биле многу поголеми. Идејата била играта да опфати огромни делови од Северна и Јужна Америка, со повеќе локации и можност за патување меѓу нив. Но, плановите не се одвивале толку едноставно.

Рокстар Гејмс во истиот период работеа и на другиот огромен наслов во тоа време „Red Dead Redemption 2“, проект кој постепено станувал сè поголем и барал ангажман од речиси сите студија на компанијата од целиот свет.

Како резултат на тоа, работата на ГТА 6 била поместена во втор план, а голем дел од ресурсите биле насочени кон завршувањето на вестерн-авантурaта која пристигна во 2018 година. Првичната замисла за огромна мапа што ќе опфаќа делови од двата американски континента подоцна била намалена на „Вајс Сити“ и околните области. Токму во 2018 година започнаа и првите посериозни шпекулации во јавноста. На 6 март, Јутјуб каналот „The Know“ објави видео во кое, повикувајќи се на анонимен извор близок до Рокстар, тврдеше дека следната ГТА ќе го носи кодното име „Project Americas“. Според тогашните информации, играта требало да се одвива во модерна верзија на Вајс Сити, но и да овозможи патување до делови од Јужна Америка.

Во следните години интернетот беше преплавен со наводни мапи, фотографии, информации од анонимни извори и теории за тоа како ќе изгледа ГТА 6. Во 2019 година се појавија шпекулации за приказна сместена во седумдесеттите и осумдесеттите години, со протагонист по име Рикардо, додека други тврдеа дека играта ќе има огромен свет инспириран од повеќе јужноамерикански градови. Се појавуваа и наводни протечени мапи, од кои голем дел подоцна се покажаа како целосно измислени.

Rockstar, од друга страна, продолжуваa да молчат и да ги негрираат информациите. Со тоа шпекулациите станаа поголеми.

Rockstar Games, Rockstar VI

Во меѓувреме, развојот на играта се соочил со дополнителни предизвици. Ковид-19 пандемијата ги испрати вработените да работат од дома, а студиото морало да ги прекине многу важните детали од нивната работа во студија за снимање движења и перформанси. Во интервју за Блумберг во октомври 2026 година, Нелсон опиша дека тимот поминал низ тежок период во кој сè уште се обидувал да ја дефинира конечната визија за играта. До крајот на 2019 година, раководството веќе ја имало основата на приказната за Џејсон и Луција, но голем дел од дизајнерските одлуки и системите во играта сè уште биле во развој.

Иако низ годините се појавуваа гласини дека проектот бил откажуван или целосно започнуван од почеток, нема официјални докази дека ГТА 6 некогаш била целосно откажана. Станува збор за долготраен процес во кој првичните планови биле менувани, дел од амбициите биле намалени, а развојот бил успорен поради други големи проекти и надворешни околности.

Првата официјална потврда дека Rockstar работи на следната Grand Theft Auto игра пристигна дури на 4 февруари 2022 година. Во кратко соопштение, компанијата потврди дека активниот развој на новото продолжение е во тек и дека нејзината цел е значително да го надмине она што претходно го понудила. Не беше објавено ни име, ни трејлер, никаква локација, датум на излегување не постоеше, но за гејмерската заедница тоа беше доволно.

Само неколку месеци подоцна, во септември 2022 година, следеше уште еден настан кој ја обиколи целата гејминг-индустрија. Непознат хакер објави десетици видеа од рана развојна верзија на ГТА 6, со вкупно околу 50 минути материјал. На снимките можеа да се видат делови од играта во развој, вклучувајќи ги Вајс Сити, главните ликови и некои од механиките. Рокстар Гејмс потврдија дека претрпела неовластен упад во својата мрежа и дека биле украдени доверливи информации, меѓу кои и снимки од новата игра. Компанијата изрази разочарување што материјалите биле објавени на тој начин, но истовремено порача дека инцидентот нема долгорочно да влијае врз развојот на проектот. За игра која со години се чуваше во строга тајност, ова беше огромен удар.

Декември 2023 – конечно го добивме првиот трејлер

По речиси две години од официјалната потврда дека се работи на следната игра, Рокстар Гејмс конечно ставаат крај на тишината. На 8 ноември 2023 година, ко-основаrчот и претседателот на компанијата, Сем Хаузер, објави дека првиот трејлер за следната ГТА ќе пристигне на почетокот на декември, во месецот кога Рокстар Гејмс го одбележуваше својот 25-годишен јубилеј.

Возбудата меѓу фановите беше огромна. На 1 декември компанијата потврди дека трејлерот ќе биде премиерно прикажан на 5 декември во 15:00 часот. Но, планот не издржа ни до закажаната премиера. Вечерта на 4 декември, на социјалните мрежи се појави протечена верзија од трејлерот, со низок квалитет и жиг. Рокстар реагираше брзо и реши да ја објави официјалната верзија порано од планираното, со кратка порака дека трејлерот протекол и дека фановите треба да ја погледнат вистинската снимка на Јутјуб.

И така, по повеќе од десет години чекање, конечно го видовме првиот официјален поглед кон Grand Theft Auto 6.

Во нешто повеќе од минута и половина, Рокстар ни го претстави фиктивниот свет Леонида, измислената американска сојузна држава инспирирана од Флорида, со неонските улици, плажите и препознатливата атмосфера на Вајс Сити. Трејлерот ги откри и двајцата главни протагонисти – Луција и Џејсон, криминален пар чија приказна очигледно ќе биде еден од централните делови на играта.

Особено внимание привлече Луција, која стана првата жена протагонистка во главната приказна на серијалот со можност за играње во модерната ера на Grand Theft Auto. Уште првите кадри ја прикажаа во затвор, а потоа ја видовме заедно со Џејсон во свет полн со криминал, забави, луди интернет-трендови и препознатливи ситуации што Рокстар ги користи за да ја исмева современата американска култура.

Кога Rockstar го објави првиот трејлер, најавата беше дека играта ќе пристигне во 2025 година. Неколку месеци подоцна, во мај 2024 година, Take-Two Interactive, матичната компанија на Rockstar, го стесни периодот на излегување на есента 2025 година. По толку долго чекање, фановите конечно имаа барем приближен рок кога ќе можат да ја видат играта.

Но, на 2 мај 2025 година пристигна првото големо разочарување. Рокстар објави дека играта нема да излезе во есента истата година, туку на 26 мај 2026 година. Компанијата им се извини на фановите за дополнителното чекање и објасни дека им е потребно повеќе време за да ја заврши играта на нивото на квалитет што публиката го очекува од неа.

Одложувањето беше разочарувачко, но многумина се надеваа дека дополнителните месеци ќе бидат доволни. Четири дена подоцна, на 6 мај, Rockstar го објави и вториот трејлер, со нови сцени од играта, повеќе детали за Џејсон и Луција и прв поголем поглед кон животот во Леонида. Возбудата повторно се врати, а датумот 26 мај 2026 година стана новата цел за фановите.

Сепак, ни тој датум не беше конечен. На 6 ноември 2025 година, Рокстар објави дека ГТА 6 повторно се одложува, овојпат за 19 ноември 2026 година. Во соопштението компанијата наведе дека дополнителното време е потребно за да го доврши проектот и да го испорача квалитетот што играчите го очекуваат. Со ова, играта беше поместена за речиси шест месеци од претходно најавениот датум.

Два одложувања за помалку од една година, а со секое ново соопштение фановите добиваа уште малку трпение како задолжителен дел од ГТА искуството. Интернетот, се разбира, не пропушти да се пошегува на сметка на постојаното поместување на датумот, но зад шегите остануваше едно прашање: дали Рокстар конечно ќе го испочитува и овој рок? На 17 ноември 2026 година, официјалниот датум на излегување останува 19 ноември. По тринаесет години од ГТА, речиси три години од првиот трејлер и две одложувања, до излегувањето на играта остануваат само два дена.

По сите одложувања, трејлери и години чекање, ГТА 6 конечно влезе во последната фаза пред излегувањето. Во јуни 2026 година Рокстар ги отвори преднарачките, со што играта и официјално почна да се подготвува за своето лансирање. На располагање беа две изданија – Standard Edition и Ultimate Edition, која вклучува дополнителни дигитални содржини поврзани со приказната на Џејсон и Луција. Сите што ќе ја купат играта пред 20 ноември добиваат и Vintage Vice City Pack, со предмети инспирирани од препознатливиот изглед на градот.

Во последните недели пред лансирањето, Рокстар продолжи да го гради интересот со нови материјали. На официјалната страница се појавија дополнителни снимки од играта, галерија со слики од Леонида, како и повеќе информации за музиката што ќе го придружува патувањето низ Вајс Сити и околината. Компанијата постепено откриваше нови детали за светот, неговите жители и атмосферата, но истовремено продолжи да чува голем дел од приказната и изненадувањата во тајност.

Цел Мајами е во изглед на Вајс Сити

Најголемиот дел од промотивната кампања беше насочен во Мајами. Рокстар реши да ја искористи таа поврзаност и буквално да го претвори вистинскиот град во промотивна верзија на светот од играта.

На улиците се појавија билборди од фиктивни компании, фиктивни телевизиски станици, ресторани и ноќни клубови што постојат само во играта. Наместо обични реклами за самата игра, минувачите можеа да видат промоции за „Weazel News“, автомобилската компанија „Coil“, радиостаницата „Chamber 106.6“ и други брендови од универзумот на играта. На плажите во Мајами Бич беа поставени розови и сини чадори и лежалки со ознаките на Vice City, а низ градот се појавија тематски автобуси, возила и големи мурали со Џејсон и Луција.

Еден од највпечатливите потези беше огромниот натпис „Welcome to Vice City“ поставен на покривот на „Kaseya Center“, арената во која настапува кошаркарскиот тим „Мајами Хит“. Целата кампања беше толку голема што локалните власти на округот Мајами-Дејд објавија промотивен пакет вреден 3,9 милиони долари, кој опфаќа рекламирање на меѓународниот аеродром, пристаништето и низ јавниот транспорт. Дел од договорот со Рокстар беше и самиот натпис на арената.

Интересно е што оваа промоција отвори и локална дебата. Некои претставници на властите се спротивставија на користењето јавни ресурси за рекламирање игра во која има криминал и насилство, додека други сметаа дека градот треба да ја искористи светската популарност на GTA 6 за да привлече внимание и посетители.

Иако Мајами беше центарот на кампањата, Рокстар не ја ограничи промоцијата само на градот што го инспирираше Вајс Сити. Во неделите пред излегувањето, големи реклами со Џејсон и Луција се појавија во Њујорк, Лос Анџелес, Чикаго, Париз, Лондон, Виена, Келн, Варшава, Мадрид, Барселона и Лисабон. Кампањата стигна и до Токио, Тајпеј, Сингапур, Хонг Конг и Мелбурн.

Во некои градови беа поставени огромни билборди и дигитални екрани, додека на други локации цели фасади на згради беа покриени со промотивни илустрации. Во Париз, на пример, рекламата на кулите Les Mercuriales привлече особено внимание, со огромни прикази на главните ликови и датумот на излегување. Во Лондон, промоцијата се појави и на фасади и во големи трговски центри, а во други градови беа забележани автобуси целосно обложени со визуелниот идентитет на играта.

Целта беше едноставна, каде и да се наоѓаат фановите, да добијат впечаток дека ГТА 6 е насекаде. И секоја фотографија од нов билборд, мурал или автобус дополнително ја ширеше кампањата на интернет, без Рокстар да мора да објавува посебна реклама за секоја локација.

Една од најинтересните соработки е договорот со NBA тимот Мајами Хит. На 18 ноември, ден пред официјалното излегување на играта, тимот ќе настапи под името Вајс Сити во специјален настан наречен „Ноќ во Вајс Сити“. За таа пригода се подготвени специјални дресови во црна и розова боја, тематски кошаркарски терен и производи со визуелниот идентитет на играта.

Музиката отсекогаш била еден од најпрепознатливите делови на серијатлот. Радиостаниците, водителите, рекламите и песните што ги слушаме додека возиме низ градот често стануваат исто толку незаборавни колку и самите мисии. Студиото добро знае дека музиката е важен дел од идентитетот на серијалот, па затоа и промоцијата на играта ја искористи за да создаде дополнителна возбуда, но и да ја претстави атмосферата на светот во кој ќе се одвива играта.

Уште во првиот трејлер се покажа колку добро Рокстар знаат да изберат песна што ќе остане поврзана со играта. За музичка подлога беше избрана „Love Is a Long Road“ од Том Пети, песна објавена во 1989 година на неговиот албум „Full Moon Fever“. Изборот се покажа како полн погодок. Песната се вклопи со приказната за Џејсон и Луција, но и со атмосферата на Флорида, од каде што потекнуваше самиот Пети.

Ефектот беше видлив и на музичките платформи. Според податоците што Спотифај ги сподели со „Universal Music Publishing Group“, слушањата на песната по објавувањето на трејлерот се зголемиле за неверојатни 36.97 отсто во споредба со претходната недела. Со други зборови, песна стара повеќе од три децении одеднаш доби нова публика благодарение на видео игра.

Слична приказна се повтори и со вториот трејлер, објавен во мај 2025 година. Овојпат студиото ја избра „Hot Together“ од The Pointer Sisters, песна од 1986 година. Само два часа по објавувањето на трејлерот, слушањата на песната на Спотифа пораснале за 182 отсто во споредба со истиот период една недела претходно.

Но, студото не застана само на изборот на музика за трејлерите. На 27 август 2026 година беше објавен и „Grand Theft Auto VI: An Extended Look“, подолг приказ на светот и содржините во играта, во кој музиката доби уште поголема улога. Во видеото беа вклучени 15 песни од различни жанрови и периоди, а реакцијата на публиката повторно се прелеа на стриминг-платформите.

На 17 септември 2026 година Rockstar отиде и чекор понатаму, најавувајќи го „Grand Theft Auto VI: The Album“, официјален музички албум што ќе биде објавен заедно со играта на 19 ноември. Албумот е создаден во соработка со издавачката куќа Atlantic Records и содржи 34 оригинални песни од изведувачи од различни музички жанрови.

Меѓу имињата што беа откриени во првата најава се Travis Scott, Future, Metro Boomin, Yung Lean, PinkPantheress, Fred again.., Morgan Wallen, Rauw Alejandro и Keith Richards. Првите шест синглови беа објавени веднаш, а за нив беа достапни и дигитални верзии за слушање и претходно зачувување на музичките платформи. Rockstar најави и физички изданија на албумот на винил и CD, вклучувајќи специјални колекционерски изданија.

Во септември 2013 година, кога првпат влеговме во Лос Сантос, веројатно никој не очекуваше дека ќе поминат повеќе од 13 години пред повторно да добиеме целосно нова Grand Theft Auto игра. Во меѓувреме сменивме конзоли, компјутери, телефони, музика, трендови и цели генерации гејмери. ГТА 5 остана со нас низ сето тоа време, а студиото успеа да ја претвори во една од најуспешните и најдолговечните игри во историјата.

Сега, по години шпекулации, лажни протекувања, вистински протекувања, бескрајни теории, трејлери и две одложувања, конечно сме пред вратите на Вајс Сити. Џејсон и Луција се подготвени да ја започнат својата приказна, а милиони играчи ширум светот се подготвени повторно да се изгубат во еден свет на Rockstar.

Дали ГТА 6 ќе ги оправда сите очекувања? Дали ќе постави нови стандарди за отворените светови и видео игрите воопшто? Дали ќе стане новата игра со која ќе се споредуваат сите следни големи изданија? Одговорите ќе ги добиеме дури кога ќе почнеме да ја играме. Но, едно е сигурно, ретко која игра успеала толку долго да го задржи вниманието на светот, а уште поретко некоја игра успеала да направи нејзиното излегување да изгледа како настан што го чека цела генерација.

Од Лос Сантос до Вајс Сити. Од 2013 до 2026 година. По 13 години, приказната продолжува.

GG анкета

вести и новости од

ПРИЈАТЕЛИТЕ на GG.MK

GG LFM

W00t w00t? GG ис лукинг фор мор!​
Стани дел од тимот на GG.MK!

GG ЛОВЦИ НА ТРОФЕИ

покажете го пленот

Претплати се на нашата мејлинг листа

Нема спам, нема замарање!
Само гејминг!